أستاذة تونسية توجه رسالة شديدة اللهجة للإطارات الطبية

 إلى بعض الأطباء أو الكثير منهم استاذة تدعى أمينة غرس الله تطلق تدوينة على شكل صرخة فزع بما حدث لها من الجيش الأبيض حسب تعبيرها أمامكم نص التدوينة:

سامحوني شوية من وقتكم مش نحكيلكم على التقصير و على غياب الضمير إلي عند فئة من جيشكم الابيض الي زعمة زعمة داز صدرو للكورونا و هاك الريق الفارغ..تقصيرهم مع المرضى كان سبب في موت برشا عباد منهم بابا ، الكلام هذا مذابية يشوفو جماعة الصحة من الطاقم الطبي و الشبه طبي قداش كنت نتمنى نكون في الميدان هذا لكن كي شفت عباد متهاونة بأرواح الناس قداش كرهتو و نقمت عليه... بابا عندو ضيق نفس شهر التالي فاق بيه و هذا من مخلفات الدخان قعد يتبع في حالتو عند pneumolgue و ماشاءالله على الكفاءات الي عندها اش خلاه عندو الماء في الرواري و ما فاقتش بيه قتلو عندك tâche صغيرة و عطاتو دواء غالط لين زاد بيه الشي و تعب في النفس مشى  ل  rendez-vous متاعو من غير ما تقرب و لا تلمسو même  b stéthoscope  لا بعثتتو en urgence لسبيطار وهو خارج مازال في الباب و هي تنادي  secrétaire باش تعقم وكتبت في  lettre  attention covid 

و في السبيطار كملو إلي بداتو هي  و هو مسكين ولا خايف و بعد عدوه للمهدية الطاهر صفر آخر حاجة عملوها prélèvement pcrإلي بعدها ولا intubé ventilé 

حطولو  scop فاسد مرة يخدم و مرة يقص  

دخلت أختي فرملية و تفهم تلقى  scop  حابسة بدات تصيح و تنادي بابا عمل  arrêt  ما جا حد تجري و تلوج على infirmier لقاتو قاعد  قالها شبيك تصيح scop فاسدة و ساعات تسكت مشى خدمها و رجع يكونكتي على روحو موش هنا لين سكتscop مرة أخرى و بابا عمل arrêt cardiaque و ما فاقوش بيه حتى باش يماسيووه 

حسبي الله و نعم الوكيل في كل حد تسبب في موت بابا وحرمونا منو وقت احنا مزلنا ما شبعناش بيه و ما فرحش بينا و مزلنا مستحقينو💔 حسبي الله و نعم الوكيل في كل حد قصّر في خدمتو 

أما ما نخافوش في الدنيا هاذي كما تدين تدان نعرف انها ساعتو حضرت و ايماني بربي قوي و الحمدلله  أما ما تنساوش ما دايمة لحد و سعدك يا فاعل الخير 

ملاحظة: خرج التحليل و ما عندوش كورونا خاطرو انسان مثقف و يعرف شمعناها بروتوكول صحي و حافظ على روحو بالباهي و هوما حتى بعد التحليل بعثوهولنا في sac cadavre ما راعوش مشاعرنا 

سلام


إرسال تعليق

أحدث أقدم

نموذج الاتصال